CIG P.A.S. Laboral Universidade da Coruña

MUDÁMONOS!!!

2010-09-16T18:09:00.002+02:00

Cambiamos deseño e dirección, desde agora pódesnos atopar no seguinte enderezo:

http://ciglaboral.wordpress.com

Comunicado CIG laboral (27-4-2010)

2010-04-27T11:06:00.003+02:00

Cando a idea é sacar un comunicado noxento, non hai mellor que adornalo previamente coa pedantería dun principio filosófico, aínda que enunciar principios filosóficos non é o mesmo que ter principios. O escrito da CUT trata basicamente dúas cousas: tentar atacar a unha persoa, e tentar desfacer o razoamento de que as probas convocadas non tratan igual os procesos de promoción interna e de quenda libre. Para desmentir o segundo razoamento, faise unha descrición diacrónica na que parece ter molestado moito que a CIG tentase un tratamento idéntico de ambas quendas nas diferentes reunións. E tan molesto era, que os Campións Universitarios da Transparencia (en adiante CUT) non consideraron oportuno, tampouco neste caso, poñer en coñecemento dos compañeiros que se presentarán por interna (si, efectivamente o aludido tamén se presentará por interna, sorprendente, non?) a situación que comentamos.

Segundo se manifesta, a situación exposta ten as seguintes características: é discutible; ten certa base; a lexislación é de escaso contido; os de libre estudan leis sen relación co traballo; vaia Vde. por quenda libre; a situación está levada ao limite; é improbable pero posible; isto é falso; non dicimos que menten; segue entrando dentro do posible; hipoteticamente podería darse o caso; cometer novos agravios comparativos….

A mala conciencia preside o escrito enteiro, por iso hai que emporcar o terreo. A parte común das convocatorias deixa en pura anécdota contidos como Constitución ou Estatuto, que caben nuns poucos folios, e calquera pode comprobalo. O único que se pide, en realidade, é o convenio colectivo e os estatutos da universidade, que como todo o mundo sabe, é lexislación que non nos afecta para nada. A CIG, efectivamente, tamén aprobou os contidos da parte xeral o cal non tiña nada de particular nunha convocatoria ben feita (sería a que dentro dun mesmo exame requiriría uns mínimos en cada bloque). Mais unha vez advertida a disfunción propóñense varias solucións, (non todas feitas pola CIG, por suposto), entre elas, que lembremos, a mesma proba para todos, ou a posibilidade de elixir o exame proposto para quenda libre. As vantaxes de non facer actas por parte do secretario resultan agora evidentes, pódese dicir calquera cousa pois non hai constancia documental do que cada un defendeu nin das discusións sostidas. Á CIG valíalle calquera proposta que non supuxera, como pasa agora, que presentarse por interna requira un nivel de preparación maior na proba específica. Simplemente por garantir que todo o mundo vai nas mesmas condicións.

Como a explicación que se nos dá e deliberadamente confusa, expliquemos a situación:

- Afirmase que o 25% da parte común está só establecida para auxiliares de servizo. É unha ruín e consciente mentira. Na convocatoria de técnicos especialistas en informática hai 45 preguntas para quenda interna e 60 para quenda libre, a diferencia entre ambas convocatorias son 15 preguntas da parte común que representan o 25% da proba. No caso concreto desta convocatoria unha persoa que vaia por interna necesitará contestar correctamente 18 preguntas; quen vaia por libre, no suposto teórico de aproveitar ao máximo o temario reducido da parte común, necesitará 9 preguntas correctas da parte específica para pasar a primeira proba. O mesmo pasa nas outras convocatorias.

- Se o xeito de afrontar esta situación é enviar á xente que se quere presentar por interna a que se presente por libre, estamos diante dunha burla, e da expresión máxima da incompetencia.

- É falso que non se dera en ningún momento a competencia directa entre quendas. Acordouse que para prazas reservadas exclusivamente para quenda interna se poidan presentar, na mesma convocatoria, opositores por quenda libre. A CIG rexeitou, e ao final aceptouse, que ese suposto tivera como escenario probas realizadas ao mesmo tempo para ambas quendas, pois entendiamos que era competencia inxusta. Non esquecemos que a última proba é un suposto práctico, é dicir, relacionado co traballo diario. Alguén pensa que un opositor por interna coñece o traballo diario dun servizo cando traballa noutro? Debe ser o exame dun opositor por interna, especialmente no suposto práctico, corrixido ao mesmo tempo ca o dos opositores que poden estar xa traballando nese servizo?

- Por que non acontece todo isto que estamos relatando na convocatoria de conserxes? Na convocatoria de conserxes non poderán acceder opositores de quenda libre, e non semella importar que sexa imposible facer unha listaxe de agarda para Ferrol. Cal é a razón da diferencia de trato co resto das convocatorias?

- Estase insinuando que se a CIG non está nos tribunais periga a honradez no trato aos opositores segundo sexa a súa presunta adscrición?

No referente aos ataques persoais, non hai moito que dicir, que o responsable deste despropósito se ofreza a facer un comunicado de rectificación é significativo, e se alguén esperaba que fixésemos agora acusacións persoais coñécenos pouco. Non facelo non é só unha cuestión de elegancia, tamén é ter respecto aos compañeiros que contemplan tan lamentable espectáculo. O Principio de Occam parece menos importante ca o Principio de Sicilia. Segundo o Principio de Occam unha persoa que chega a unha praza á que promociona en igualdade de oportunidades con outros compañeiros, tendo no tribunal a un membro da CUT, será que algo fixo ben. Para o Principio de Sicilia, dicir que unha persoa superou unhas probas para ocupar unha praza é información prescindible. O Principio de Sicilia tamén se impón cando se bota en cara que unha persoa ten pensado estudar para aprobar outra oposición, nós nunca consideramos o esforzo persoal como motivo de vergoña.

Ás veces, hai a impresión de que unhas liñas que se queren ofensivas conseguen que non sexa necesario comentalas, pois descualifícanse por si mesmas e descualifican a quen as fai. A CIG seguirá dicindo o que pense onde e cando sexa, así que os censores terán traballo. De calquera xeito, esta situación non é nova, unha das poucas actas que o secretario deste comité tivo a ben redactar, xa na época do anterior xerente, tiña como protagonista único a Jorge Cordal. As alusións á súa persoa, por reiteradas e tendenciosas, facían da acta un esperpento que foi obrigado corrixir, mesmo lembramos que o manifesto ridículo da situación levouno a dicir en voz alta que igual correspondía a súa dimisión. Este personaxe que hoxe se comporta así é o mesmo que o primeiro que fixo cando chegou a un cargo que lle pesa como unha enorme lousa foi pedirlle as actas ao antedito, e polo que parece non as usou como exemplo

Comunicado CIG (21-4-2010)

2010-04-21T09:50:00.003+02:00

Semella que toca romper o longo silencio voluntario que os membros da CIG laboral se impuxeron para tentar a unidade sindical, no convencemento de que os gravísimos problemas que o colectivo laboral soporta desde hai anos non podían ser solucionados doutro xeito. Isto mesmo foi buscado no comité anterior, con esa funcionarización que tantos problemas tería resolto.

O mellor é comezar polo principio. A CIG fixo unha campaña electoral na que non se prometían solucións excepcionais, fixémolo sendo conscientes de que a xente quería escoitar outra cousa e que iso podíanos custar mesmo a presenza no comité. Mais para a CIG estar no comité non era nin é un obxectivo en si mesmo, nós temos a nosa idea de como teñen que ser as cousas na administración pública, e en función diso traballamos. Unha vez no comité, e valorando a situación na que estaba o persoal (nomeadamente o persoal interino), chegamos á conclusión de que a lamentabilísima situación que soportamos a día de hoxe non era, nin de lonxe, culpa dos traballadores que levaban moitos anos sen ter a oportunidade de acceder a unha oposición. Dentro da liberdade que tiñamos, pois nada prometeramos, entendiamos que un problema excepcional requiría unha solución excepcional, e apoiamos esa solución.

Como era previsible, o camiño non era de rosas e as discusións eran frecuentes, mais sempre prevaleceu, pola nosa banda, o criterio de tentar desatascar os problemas e dar solucións, mellores ou peores, para sacar canto antes adiante o rebumbio no que estamos inmersos. Pasados moitos, quizais demasiados meses, non podemos estar contentos co traballo realizado, e somos os primeiros en facer autocrítica. As cousas foron complicándose e pasou o que tiña que pasar, dado o carácter incendiario que parece ser o cerne, a filosofía, e o “leitmotiv” dalgún membro do sindicato CUT. A CIG foi acusada, defendendo o dereito de promoción interna, (que lembremos ten que estar en igualdade de condicións que o dereito á consolidación, segundo o reparto e os acordos tomados no seu momento), de actuar defendendo o que lles interesaba persoalmente aos seus membros. A orixe da discusión era a puntuación das probas, que debido a un erro de baremación do comité, advertido pola CIG xa cando estaban algunhas convocatorias publicadas, permitía que unha persoa que non fose por promoción interna e fixese un teórico pleno na parte xeral das probas, (a priori acordada cun moi baixo nivel de esixencia), sacando unha nota de 1.5 puntos sobre 10 na parte específica aprobaría o exame, mentres que unha persoa por promoción interna precisaría un 4. A cousa complicouse aínda máis cando se pretendeu que as persoas que se presentasen en quenda libre ás prazas reservadas exclusivamente a promoción fixeran a proba á vez que a facían os opositores que se presentaban por interna, cousa que a CIG non aceptaba, pois todo o conxunto do asunto que expoñemos resultaba autenticamente surrealista. Esta acusación, aínda que estúpida, era unha acusación, polo que a CIG renunciou á súa presenza nos tribunais de oposicións e á comisión onde estabamos, xa que entendiamos que xente acusada de comportarse dese xeito non debe sentarse nun tribunal xunto á xente que os acusa.

Todo isto que hoxe expoñemos non foi reflectido nas actas do comité, simplemente porque o secretario de CUT, campións da transparencia, non elabora un acta das reunións que se fan desde a acta nº 4 feita o 19 de novembro de 2008, como podedes apreciar na páxina do comité; é dicir, ninguén sabe documentalmente os temas que se tratan nin os acordos que se toman, tampouco vós, por suposto, o que si tedes é unha morea de datas de reunións na páxina do comité onde teoricamente os campións da transparencia terían que informar. Parece ser dabondo resumir reunións de horas nun par de liñas.

Tampouco podemos estar contentos de como se levan os cursos, lembremos que se prometeu impartir un curso por cada categoría. A pregunta incrédula da CIG nas primeiras reunións do comité acabou sendo acordo. Pero para que iso fose realidade, conviría ter convocados cursos con certa dilixencia; resulta doado culpar á xerencia da demora nas convocatorias de oposición, pero semella ter máis complicación que o comité convoque cursos de formación para as prazas ao mesmo tempo que saen ou incluso antes. Onte mesmo, 20 de abril, pasados varios meses desde a convocatoria de oposicións, convocáronse tres cursos. A excesiva tardanza nas convocatorias obligará a que sexan feitos no verán.

En fin, queda moito por comentar, mais estamos seguros de que se nos invitará a facelo. Nós queremos aportar unha reflexión final. Lamentablemente, o espírito incendiario xa comentado lévanos a esta situación. Nós prefeririamos que se adicasen esforzos a solucionar todo o que temos pendente, que é moito e importante, pero hai quen prefire, diante da súa ineficacia para sacar adiante os problemas creados, plantar lumes onde se pode, pois o caso é desviar a atención para agochar a propia incapacidade. O último é un ataque covarde a todos os sindicatos da xunta de persoal; covarde polo anonimato de quen o fai, e covarde , tamén, quen o ampara. Houbo tempos nos que lamentablemente non había a variedade de organizacións sindicais da que gozamos hoxe, e neses tempos moitos dos que estamos hoxe na CIG poñiamos a foto coa nosa cara, asinabamos denuncias, e expoñiamos publicamente o que pensabamos; todo iso sabendo que non iamos recibir un cesto de Nadal cando rematase o ano. Por iso enténdese menos que xente que está hoxe na CUT, e procedía do mesmo xeito, sexa hoxe quen protexe a covardía do anónimo. Mais é verdade que moitas cousas teñen cambiado desde aquela.

Sinatura do convenio

2009-06-09T15:39:00.006+02:00

O III Convenio colectivo asinouse o día 10 de Xuño ás 10 da mañá na Reitoría. Por outra banda, lembrar que inauguramos unha sección adicada a permutas. Calquera persoa interesada en permutar con traballadores doutras universidades de Galicia, pode facernos chegar a súa solicitude. Nós publicarémola, e tamén enviarémola ás páxinas que o noso sindicato ten nas universidades galegas para xeral coñecemento.

Un saúdo

Nota informativa

2009-05-19T09:49:00.028+02:00

1/ Reunión do comité:

O comité de empresa ten unha reunión extraordinaria convocada para o xoves día 21 de maio ás 10:00 horas.

Orde do día:
- Aprobación, se procede, da acta anterior
- Asuntos de trámite
- Preparación da reunión co xerente prevista para o mércores 27 de maio ás 12 na Sala de prensa
- Liña 900 da Universidade, contratada coa empresa GSS, para información sobre a oferta de títulos
- A instancia da CIG: posible acordo sobre a promoción interna nos procesos de elaboración de listas de agarda
- Rogos e preguntas

2/ Sinatura do convenio:

A CIG quere manifestar a súa preocupación no referente á sinatura do novo convenio. Como é sabido, as asembleas celebradas o 5 e o 6 de maio ratificaron o III convenio. Pensamos que asinalo canto antes non só é importante no tocante á aplicación salarial, mais tamén para comezar canto antes o traballo de negociar unha nova RPT e para establecer un calendario de actuación no que se refire aos temas pendentes, como son dilucidar posibles erros ou modificacións nos temarios das probas, e concretar as datas nas que se desenvolverán. É evidente que a situación non se caracteriza polo seu dinamismo. Hai moito traballo por diante e nós estamos desexando facelo canto antes, polo que esiximos que se lle adique ao persoal laboral o tempo que, sen dúbida, merece.

3/ Externalización de servizos:

A postura da CUT respecto á externalización de servizos é a postura xa expresada polo resto de sindicatos en reunións previas do comité de empresa, é dicir, non é unha cousa que se lle pasara pola cabeza só á CUT. Existe consenso sobre o número desmedido de bolseiros, contratos labora, ou cuestións como a xa referida da externalización de servizos, asuntos que todos os sindicatos consideraban de vital importancia e que ían ser trasladados á xerencia. Pensamos que hai servizos que non só e que teñan bolseiros ou contratos labora, é aínda peor, hai servizos que dependen, a día de hoxe, exclusivamente do traballo desas persoas. Iso xa estaba falado e acordado, agora reunirémonos para falar e acordar o mesmo. Conviría recordarlle á CUT que o período electoral xa pasou. Se queren patrimonializar as preocupacións e o traballo de todos, aló eles, en calquera caso non nos sorprende, hai costumes adquiridos que son difíciles de erradicar. Nós seguiremos usando as mesas para traballar, que é para o que serven, tentando que os problemas endémicos desta universidade se resolvan pola vía da negociación e do consenso, e, a poder ser, con máis celeridade da que levamos amosado ata agora. O mellor servizo que pode facer CUT ao conxunto do persoal laboral, é non perderse en discusións absurdas, como adoita, e ser conscientes de que tempo non é sinónimo de eternidade. Urxen as solucións aos problemas presentes. Queremos saber como, cando e onde, no que respecta ás oposicións, á transitoria II e á promoción interna. Como, cando e onde, esas son as preguntas que urxen e as respostas que non se dan.

Postura da CIG no III Convenio Colectivo

2009-05-07T11:05:00.003+02:00

1/ Persoal interino
2/ Salario
3/ Transitoria II e promoción sen mobilidade
4/ Funcionarización
5/ Retos do comité

1/ Persoal interino:

Este novo convenio nace como instrumento de traballo para xestionar unha situación excepcional, como é a estabilización do persoal interino, a cal constitúe un exemplo único de desidia nunha administración pública que deixa medrar ata máis da metade do número de traballadores dito persoal. Non hai só un culpable de que se dese esta situación, mais na CIG dixemos no programa electoral que apoiaríamos as iniciativas que desen saída a esta situación insoportable que hipoteca calquera tipo de proxecto de futuro, e mesmo ten dividido ao colectivo, e iso faremos. A solución que se dá aos compañeiros interinos non é un proceso de consolidación, é un concurso-oposición integrado no convenio colectivo, que sempre pensamos que era onde debía estar, e que deixa, por unha soa vez, (confiamos no compromiso de que ésta sexa unha solución excepcional na historia desta universidade) que os interinos que aproben a oposición poidan ter unha situación de concurso moi favorable que permita estabilizar o seu posto de traballo. O reflexo de todo isto en convenio colectivo, fai que a CIG decida apoiar, tamén, esta parte do convenio. Por último, seguimos sen entender o porqué este problema non apareceu no convenio colectivo de 2005. Nese ano o problema era igual de importante e teríamos aforrado moito tempo.

2/ Salario:

Parécenos un acordo aceptable, que ademáis reflicte a demanda que fixemos no programa electoral dunha simplificación dos complementos, ademáis de corrixir as situacións inxustas que se daban en varias categorías que non tiñan o recoñecemento necesario.

3/ Transitoria II e promoción sen mobilidade:

Sería conveniente unha explicitación do que se quere no que se refire ás categorías afectadas pola transitoria II. Esa insistencia nosa non tivo éxito e preferiuse adiar o problema deixándoo como estaba. A insistencia non era só importante no que se refería aos grupos IV-A e IV–B, pois se se acepta que esta transitoria afecta a todas as categorías do IV-A, isto tería como consecuencia que a promoción sen mobilidade sería unha nova vía de promoción para todo o colectivo, e a nós parécenos ben. A transitoria II deberá ser aplicada ao longo do ano 2010, non aceptaremos un retraso. Esta aplicación só depende da nova RPT e esa RPT ten que ser pactada antes deste outono.

4/ Funcionarización:

A funcionarización é o camiño para termos a oportunidade dunha verdadeira carreira profesional. Só hai que reparar na cantidade de prazas de promoción que se levan dando no persoal funcionario para decatarse da situación na que estamos. A CIG segue considerando este asunto prioritario, e lamenta que estivésemos a punto de pechar o convenio sen facer unha mínima referencia a este punto.

5/ Retos do comité:

Este comité ten tres retos:

1º / A nova RPT ten que estar pactada como moi tarde en outono do 2009.

2º / Ten as ferramentas para regularizar o cadro de persoal, e ten que facelo con rapidez, con prazos e sen disculpas. Esixiremos que este proceso sexa feito con dilixencia. É imprescindible facer un calendario para que todo o persoal saiba, antes de marchar de vacacións, cando van sair as oposicións. Unha vez feito o calendario de convocatorias, estimamos que 18 meses é tempo suficiente para rematar co proceso selectivo, proceso que deberá estar rematado antes de abril de 2011.

3º / O último paso deberá ser ofrecer un novo acordo de funcionarización, obxectivo irrenunciable para a CIG. Xa que todos os sindicatos opinan que é boa, é imprescindible, cando todo este proceso teña rematado, ofrecer unha funcionarización que sexa aceptada por todos.

COMUNICADO POST-ELECTORAL

2008-10-17T11:05:00.005+02:00

A CIG partía dunha situación difícil nestas eleccións para o novo Comité de Empresa, e pensamos, cando comezamos a traballar na campaña, que esa situación non podía cambiar o que sempre pensamos e defendemos. Como resultado do anterior, ofertamos un programa que tentamos que fose honesto, coherente, e que ofrecese solucións. Evitamos, como sempre, enganos ou tentativas de ofrecer realidades distintas á que realmente temos, e evitámolo aínda sabendo que contar a realidade podía non ser ben entendido, éramos conscientes diso. Xa que logo, agradecemos especialmente á xente que entendeu a nosa mensaxe o seu voto, e agradecemos de corazón o apoio de moita xente, que mesmo non habendo estado con nós noutras ocasións, nos permitiu poder presentarnos e acadar representación nas dúas mesas electorais. Aínda que evidentemente non dirixiremos o Comité de Empresa, podemos dicirvos que apoiaremos as solucións que sirvan para desatascar a malísima situación histórica que padecemos sexa quen sexa o que as presente. Mais tamén que seremos os primeiros en denunciar contundentemente o incumprimento de todo o que se dixo e ofreceu estos meses. Moitísimas gracias a todos.

RESULTADOS ELECCIÓNS A COMITÉ DE EMPRESA 2008

2008-10-16T22:56:00.013+02:00

Os resultados das eleccións son os seguintes:

Grupos I, II, e III. Mesa de Coruña:

Votos emitidos: 108
Votos nulos: 2
Votos en blanco: 4

CC.OO: 27 CIG: 8 CUT: 39 UGT: 8 USO: 20

Mesa de Ferrol:

Votos emitidos: 18

CC.OO: 0 CIG: 2 CUT: 10 UGT: 2 USO: 4

Total Grupos I, II, III:

CC.OO 27 CIG: 10 CUT: 49 UGT: 10 USO: 24
_____________________________________________________________

Grupos IV-A e IV-B Mesa de Coruña:

Votos emitidos: 101
Votos blancos: 4

CC.OO: 3 CIG: 14 CUT: 72 UGT: 8

Mesa de Ferrol:

Votos emitidos: 27

CC.OO: 4 CIG: 4 CUT: 16 UGT: 3

Total grupos IV-A e IV-B:

CC.OO: 7 CIG: 18 CUT: 88 UGT: 11
_____________________________________________________________

TOTAL GRUPOS: CC.OO: 34 CIG: 28

CUT: 137 UGT: 21 USO: 24

_____________________________________________________________

MEMBROS DO COMITÉ DE EMPRESA:

GRUPOS I, II e III: CUT: 2

CIG: 1 CC.OO: 1 UGT: 1 USO: 1

GRUPOS IV-A e IV-B: CUT: 5 CIG: 1 UGT: 1

VOTA CIG, VOTA SOLUCIÓNS

2008-10-09T16:05:00.008+02:00

Eleccións a Comité de Empresa

2008-09-04T10:57:00.010+02:00

CONVOCATORIAS DE PRAZAS

2008-06-20T14:40:00.008+02:00

Algunhas consideracións sobre as convocatorias de prazas

Como todos sabedes xa, a Xerencia remitiu para a valoración do Comité en funcións unha oferta de prazas para as categorías de informáticos dos tres grupos, valoración que o Comité non fixo ó entender que está en funcións e que como Comité non debe proporcionar ese informe. Cousa distinta é a valoración que como sindicato facemos da situación actual, a cal pasamos a expoñer:

1/ A convocatoria de oposicións de persoal laboral, e máis nesta universidade cos antecedentes que coñecemos, ten por forza que ser saudada positivamente polo colectivo. É dicir, o feito de que haxa por fin interese en desbloquear a situación creada, con tantos anos sen oposicións de xeito regular e como consecuencia disto o volume tan grande de compañeiros interinos, ten que ser en si unha boa noticia para nós.

2/ Como resultado do razoamento anterior o lóxico sería pensar que os representantes dos traballadores acollen as convocatorias como un xeito de regularizar o que se tentou por vía do proceso de funcionarización, finalmente rexeitado pola maioría. Mais isto non sucede exactamente así. Por unha banda, había a teoría defendida por algúns que dicía que non podía haber proceso de funcionarización sen executar inmediatamente a RPT de 2005; quen defendía esta teoría agora está a favor de adiar estas convocatorias ata a elección do novo Comité. O novo Comité, seguindo este razoamento, tería que retomar inmediatamente estas convocatorias para darlle saída canto antes ás oposicións, ou sexa, que habería un retraso dalgúns meses en calquera caso. ¿ É isto así? pois parece que non. Aparece unha peza máis no taboleiro, a peza que trata de variar as regras de xogo que todos nos demos no convenio colectivo e que fala de variar as porcentaxes de acceso na baremación de méritos. Esta variación da baremación é evidente que non sería cousa de dous días, pois sería preciso en primeiro lugar un acordo entre os sindicatos ou grupos electorais presentes no comité, o que levaría a un novo adiamento. Se isto se dese, o seguinte paso sería un acordo entre o mesmo comité e a xerencia, é dicir, moito máis tempo. Logo, a publicación nun novo convenio colectivo deses cambios, sempre e cando haxa acordo dun convenio colectivo, claro, e non volvamos ós tempos nos que non se acordaban novos convenios, senón que se prorrogaban os anteriores. Máis tempo.

3/ A CIG quere ser clara a este respecto e manterá unha postura de máxima coherencia nos seguintes principios:
- Os compañeiros interinos teñen todo o dereito a buscar as mellores condicións no acceso definitivo ó seu posto de traballo, mais é necesario resaltar que non só eles son os afectados nesta situación. Convén recordar que existe tamén o dereito á promoción interna, dereito que non foi precisamente dos máis exercidos na historia desta Universidade. As solucións que se queiran buscar para o persoal interino non poderán ser a costa do dereito á promoción interna do persoal fixo. Nin a costa de adiar constantemente as oposicións en función de conveniencias conxunturais. As convocatorias deberán sair dun xeito regular e inmediato, e en base ó convenio colectivo que se acordou para executar a RPT de 2005 e ós acordos acadados polo anterior Comité, acordos que a CIG acolleu no proceso de funcionarización xustamente por ser acordos previos no marco de referencia anterior. ¿Ou é que eses acordos tampouco valen? ¿Tampouco vale o reparto das prazas feito no 2006, reparto que respectaba os postos de traballo ocupados por compañeiros interinos, e que nalgún caso impedía o exercicio da promoción interna a prazas concretas ó estaren xa ocupadas? ¿Todas as solucións que se van ofrecer no futuro pasan por un aprazamento “sine die” das convocatorias, como foi o habitual ata agora? Nós temos o convencemento de que se quere introducir unha situación que tería moitísima gravidade. Pensamos que o que se quere é cambiar o reparto de prazas acordado, en función de novos intereses; non executar a RPT de 2005, cousa que sería indefendible, cando non hai nada todo o mundo urxía que se executase canto antes; e por último, supeditar todo o anterior á redacción dun novo convenio que busque executar as prazas dunha nova RPT, cunha nova baremación, e cun novo reparto que non buscaría o interese común, senón o intererese só dunha parte do colectivo laboral. E no entanto outra situación de bloqueo, por enésima vez, das lexítimas expectativas de convocatoria de oposicións. Todo isto por nós inasumible.
- A CIG non aceptará que o proceso de convocatorias xa comezado sexa un camiño cheo de atrancos e de retencións sen xustificación. O noso sindicato anima a que este inicio de convocatorias sexa unha oportunidade para todos, porque é xusto, e porque xa era hora. Estamos convencidos de que actitudes que acaben poñendo freo ó que deberá ser unha oportunidade para aqueles que levan tanto tempo esperando, sexan fixos que buscan promoción ou interinos que buscan acceder ó posto de traballo, non serían entendidas pola maioría de vós. Un saúdo.

PROXECTO DE ORGANIGRAMA COA REESTRUCTURACIÓN DO SIC

2008-06-10T10:54:00.006+02:00

Estimados/as compañeiros/as:

Por fin, o pasado xoves día 5 do presente mes, a Vicerreitora fixo público o proxecto de organigrama coa reestruturación do Servizo de Informática e Comunicacións(SIC). A tal efecto reuniu o Consello de Dirección do SIC coa presenza engadida do actual Adxunto á vicerreitora e presentou o devandito organigrama(achegamos o organigrama). Na reunión por parte da Vicerreitora solicitounos a presentación de alegacións con data límite o martes día 10, aos efectos de convocar outra reunión do Consello o mércores día 11.

Despois de estudalo en profundidade dende a CIG queremos facervos chegar as seguintes reflexións:

O Consello de Dirección do SIC está composto pola Vicerreitora, o Director do Servizo, os Coordinadores das áreas, dous representantes dos Técnicos Especialistas en Informática( Operadores) e dous representantes de Técnicos de Grado Medio en Informática(Programadores). Segundo o regulamento do Consello estes representantes teñen un cargo de duración limitada a dous anos(xa rematados), e co agravante de que os que estaban xa non representan ao colectivo polo que foron elixidos pois cambiaron de categoría e /ou posto.

Dada a transcendencia do presentado coidamos que é necesario que no Consello estean todos os colectivos representados, polo que esiximos que antes de nada se renoven os cargos de representación, e se inclúan dous representantes dos Técnicos Superiores en Informática(Analistas), que de acordo co regulamento poden acudir con voz aínda que sen voto. Logo disto débese de abrir un novo prazo para que todos os membros do colectivo poidan presentar alegacións.

A continuación entramos a valorar o organigrama presentado, que tal e como denunciabamos no anterior comunicado menoscaba seriamente os dereitos laborais do colectivo:

O organigrama presentado ven de soterrar a estrutura de áreas acordada co Comité de Empresa e tomado como base para a elaboración da RPT, senón ¿a santo de que a inclusión das prazas de coordinación na RPT do 2005?.

Ao desaparecer a estrutura das áreas, calquera persoal do SIC pode ser obxecto de traslados indiscriminados dependendo da vontade do Adxunto a Vicerreitora, deixando sen efecto o dereito a participar nun concurso de traslados ou a permanecer no seu posto de traballo se así o desexa. De feito este organigrama converte en papel mollado o concurso de traslados resolto recentemente e a asignación do persoal do SIC ás áreas, como figuraba no anexo ao concurso. Así, neste organigrama cítanse compañeiros que pediron traslado a unha praza dunha área cun ámbito de traballo definido e agora o "trasladan" a outra cun traballo totalmente distinto. Pero máis abraiante aínda, é que compañeiros que estaban contentos no seu posto de traballo, e non concursaron, trasládaos á forza segundo o criterio "obxectivo"??? do adxunto. ¿Vai a ser o servizo do SIC a primeira porta que se abre para comezar a negar un dos dereitos básicos recoñecidos no segundo convenio colectivo do persoal laboral, como é o dereito ao concurso de traslados e de méritos ao resto dos laborais da Universidade.?

Se esa estrutura non respecta o concurso de traslados tampouco respecta o concurso de méritos polo que se nomearon os coordinadores. Os Coordinadores de área agora pasan a ser coordinadores de proxectos dependendo do Director do servizo ou do adxunto, pero tamén hai TSI que coordinan proxectos e non dependen de ningún Coordinador, polo que pasan a depender directamente do Director do servizo ou do adxunto. E dicir fan a mesma función que un coordinador pero non cobran o complemento. Ou sexa, tanto os coordinadores como os TSI quedan ao mesmo nivel. Só que os coordinadores cobrarían distinto plus.

A CIG mantivo unha reunión a semana pasada co Reitor para falar dun único tema, o estado actual do Servizo de Informática e Comunicacións. A estrutura presentada non cumpre coa palabra dada, o Reitor díxonos que se respectarían escrupulosamente os dereitos dos traballadores acadados nos distintos concursos de méritos e traslados realizados. Pero a realidade é que con este organigrama négasenos a capacidade de traslado a calquera praza vacante nun hipotético concurso, xa que a mobilidade queda a criterio do perfil que che asine o Sr. Adxunto. Ademais na práctica os coordinadores de área quedan na estructura exactamente igual que os TSI ou se vos gusta máis os TSI van realizar as mesmas funcións que os coordinadores, para chegar a esta situación non se necesitaba nin realizar o concurso de méritos nin o de traslado, tantas horas perdidas para convocalo, organizalo e resolvelo, alguén debería responder por este despropósito e este desaguisado.

En resumo, non podemos consentir baixo a desculpa de que "os servizos informáticos non funcionan", -dito polo Sr. Reitor- entren a saco no que parece unha represalia pura e dura ao colectivo, vulnerando os nosos dereitos máis elementais.

Non esperabamos que este equipo de goberno actuase dese xeito tan ruín que tanto nos recorda aos tempos pasados, e que fosen máis valentes e se sentasen a analizar e a resolver con valentía as posibles deficiencias e problemas que poida presentar o servizo.

Nesta ligazón podedes consultar o organigrama do SIC 2008 http://www.scribd.com/full/3292952?access_key=key-hkoz7n9g4r8r3ikcq6r

Un saúdo.

ENTREGA DE RENUNCIAS DO COMITÉ

2008-06-04T12:50:00.008+02:00

A todos os compañeiros-as do PAS laboral:

Como xa foi exposto nun comunicado anterior, no punto 3, e con data de 22/5/2008, unha vez no noso poder as sinaturas de todos os compañeiros, titulares e suplentes, foron entregadas no SMAC esas sinaturas, o que facemos público para xeral coñecemento. Un saúdo

2008-05-30T10:16:00.005+02:00

O LABIRINTO DO SERVIZO DE INFORMATICA DESTA UNIVERSIDADE

No 2005 pechouse a actual RPT na que se fixo un cambio de nomeamento das prazas de informáticos e se plasmou a creación de oito prazas de Técnicos Superiores en Informática Coordinadores de Área.
En marzo do 2007, publicouse un concurso de traslados para o persoal laboral con dous anexos, un dos cales dividía a o servizo en 8 áreas e asignaba o persoal as devanditas áreas. Este anexo tomouse como documento para que os traballadores fixeran a súa escolla das prazas vacantes, e foi referendado polo comité de empresa.
En xullo de 2007, convocouse o concurso específico de méritos para a provisión das prazas de coordinadores e pechouse o un de decembro do mesmo ano coa toma de posesión dos Coordinadores de área.
En febreiro, e dicir dous meses despois, e nomeado un adxunto a Vicerreitora que despois dunhas reunións con algunha xente do servizo, fai unha publicación co novo esquema do SIC no que se elimina a estrutura do servizo pactada co Comité e divide o servizo en tres grandes áreas. Todo o persoal do SIC queda nunha nebulosa na que o adxunto, segundo o perfil que lle asigne, e só co seu parecer, queda a disposición das tarefas que lle soliciten e mesmo cambialo de área e de funcións si é da súa consideración.
Posteriormente díxoselle aos traballadores que ese esquema non fora ben entendido, que só se trataba dun esquema funcional e non de organización de servizo e que se faría público por xerencia o organigrama do SIC. Ata o de agora non se publicou nada, e o que si podemos constatar e que se esta a executar a organización publicada.
De seguido, os traballadores solicitaron unha xuntanza con Xerencia coa presenza da Vicerreitora, o Adxunto e o Director do servizo para pedirlles explicacións. Nesa xuntanza, os responsables da Universidade afirmaron que o único documento válido e a RPT e o anexo no concurso de traslados só era a título informativo para o concurso de traslados, polo que non existen as áreas e a asignación do persoal as mesmas. Do mesmo xeito, o acordo de levar á nova RPT
a estrutura pactada co Comité de Empresa non e vinculante para Xerencia.

Dende a CIG queremos sinalar:

1. No SIC xa existe un posto de libre designación, e é o Director do servizo. Non ten ningún sentido que haxa dous postos de confianza que se pisan competencias. O que ten que facer o Equipo de Goberno é o que prometeu no seu programa electoral, profesionalizar o servizo. Se non se confía no Director se debe nomear outro e non crear a figuras de Adxunto con competencias de persoal. Ao respecto artigo 91 dos estatutos da UDC di:
"O persoal de administración e servizos dependerá organicamente da xerencia da universidade e funcionalmente da secretaría xeral, vicerreitorados, decanos e directores de centros, de departamentos, de servizos ou de entes aos que estea adscrito".
¿Onde aparece a figura de Adxunto con atribucións de persoal?
2. Mentres non exista unha nova RPT co novo organigrama, deberanse respectar os dereitos dos traballadores conseguidos nos correspondentes concursos, tanto de traslados como de méritos. O cal leva a consolidar a estrutura e destinos acadados nos concursos.
3. Recoñecemos a capacidade da Universidade para organizar o servizo, pero nun procedemento negociado cos órganos competentes de representación dos traballadores e de acordo coa legalidade. O servizo ten que ter unha estrutura estable e non pode estar baseada nas ocorrencias do Adxunto que toque.
4. Se esta situación non se reverte, os traballadores teremos que tomar iniciativas contundentes na defensa dos nosos dereitos e da legalidade vixente.

SOBRE A DIMISIÓN DO COMITÉ

2008-05-22T10:06:00.014+02:00

Tendo coñecemento de que hai quen ten dúbidas sobre a dimisión do comité de empresa, facemos pública a situación actual, dentro do noso interese en traballar coa máxima transparencia posible. A situación actual non é a que se vos comunicou na carta anónima que recibiredes hoxe, é a seguinte:

1/ Afirmar que o comité de empresa ten que dimitir non ten moita lóxica, porque o comité de empresa responsable do preacordo dimitiu con data 28 de abril de 2008, non foi ao día seguinte da votación porque o comité de empresa, como calquera organismo que se reúne, ten que ser convocado cunha mínima antelación, é unha cuestión de procedemento legal.

2/ A entrega do escrito de dimisión foi realizada na Reitoría con data 29 de abril de 2008 no rexistro xeral da universidade, calquera que teña interese en comprobar isto poderá e podía facelo cando quixera.

3/ O comité que asinou o preacordo non pode obrigar a dimitir aos compañeiros que están de suplentes, e menos dun día para outro. O sindicato CIG en concreto está pendente da dimisión dunha persoa que ía nas súas listas, e que en breve comunicará a súa decisión. En función dela entregarase no SMAC a renuncia ou ben total, ou ben case total dos membros da nosa candidatura.

4/ Nós tamén sabemos os prazos para a convocatoria de novas eleccións, e contando con isto non parece que o período vacacional sexa o mellor período para facelas. A nosa intención como sindicato e que sexan convocadas xusto pasado o periodo vacacional.

Quedamos, como sempre, á vosa disposición para calquera dúbida ou cuestión que nos queirades trasladar.

Un saúdo

22/05/2008

COMUNICADO POST-REFERENDO

2008-05-15T11:45:00.005+02:00

Sección sindical da UDC

Desde a CIG impulsamos desde hai moitos anos a idea da creación do corpo único de PAS. Este proxecto podíase ter tornado realidade mediante o Acordo de Funcionarización. Pensábamos e seguimos pensando, que o texto proposto era bo para o conxunto do actual PAS laboral. Non obstante, posto que o colectivo en referendo rexeitou o acordo, cómpre sacar as conclusións oportunas:

 É evidente que o comité de empresa en xeral, e a CIG en particular, fallaron na capacidade de comunicación co colectivo.
Non se souberon transmitir as bondades do acordo, nin se soubo contrarrestar a propaganda demagóxica en contra. Un exemplo evidencia isto: o acordo para nada prexudicaba aos interinos, mais moitos deles pensaban que si. Outro erro foi facer unha pregunta rebuscada en vez de preguntar directamente se se estaba de acordo ou non co Acordo de funcionarización.

 O corpo único, algo que sempre foi un obxectivo básico da CIG, non parece que sexa un tema abordable e acadable a curto prazo.
Resulta curioso que as persoas e a UGT que propugnaron o NON digan, aínda despois do referendo, que queren o corpo único. Por que non teñen o honestidade de dicir o que realmente pensan e queren? Que presenten un proxecto concreto, viable e factible ou que deixen de dar a vara. O non polo non, non debe ser folla de ruta do futuro nesta universidade. A CIG buscará dar solucións aos problemas que haxa, empregando o tempo que faga falta en acadar esas solucións, sendo sempre firme na defensa do colectivo.

 Unha parte importante do PAS laboral (posiblemente grupos e categorías completas) si que está interesado na funcionarización. Esta é unha realidade que non se pode negar nin ocultar.

Cales son as prioridades

De cara ao futuro, hai que ter claras cales son as prioridades, ordenalas, non embarullalas e facer todo o posible por tentar resolver os problemas do colectivo o máis axiña posible. En consecuencia, o que hai que facer a curto prazo é:

1º) Convocatoria de eleccións sindicais o máis axiña posible e que o PAS laboral conte cun novo comité. A CIG vai impulsar por sí que as eleccións sexan o antes posible. Non obstante, e dados os prazos legalmente vixentes, é posible que a elección e constitución do novo comité tarde uns cantos meses.

2º) A convocatoria dos concursos-oposición de todas as prazas vacantes da RPT de 2005 débese facer de inmediato, é irrenunciable. Non pode haber escusas por parte de ninguén: Universidade, sindicatos ou quen sexa. É o prioritario. Hai que rematar cunha situación que fai que case a metade do persoal sexa interino, unha porcentaxe inadmisible en calquera administración pública. Dada a cantidade de convocatorias a realizar, por moi ben e rapido que se faga todo, na práctica os procesos selectivos vanse alongar polo menos 18 meses. Así que non hai tempo que perder.

3º) Unha vez elexido o novo comité, será necesario que este negocie coa Universidade un novo convenio colectivo. Esta negociación ten que culminar cun acordo entre as partes que resolva os importantes asuntos pendentes. En concreto, deberá adecuar a RPT para darlle cabida á execución da transitoria segunda para que contemple a promoción de telefonistas, auxiliares de servizo e conserxes.

09/05/2008